|
Létste update: 22 fibrewari 2023
Waat geit dur allemaol
gebeure en waat is dur allemaol gebeurdj?
 Halerse
Dolle Dinsdig, 21 fibrewari 2023
Op dinsdig
trok de bóntje stoet door de straote van Haler. Mit 17 nummers waas
ut dit jaor eine iets kortere, mer hae waas supersjoeën mit leuke en
good bedachdje creasies.Nao de optocht waerdje ut fieëske in Ós
Dörpshoeës doorgeveerdj mit óm 18.30 oor de prieësoetreiking. Dank
aan alle deilnömmers aan de optocht, de vriewilligers in Ós
Dörpshoeës die ut meugelijk höbbe gemaaktj det wae vastelaovendj
koste veere, de sponsore die ut meugelijk maake det wae auch sjoeën
prieëze aan alle optochtdeilnömmers kinne oetreike en alle anger
minse die ich óngetwiefeldj bin vergaete te nömme. Vanaovendj nog ut
askruuske hoole en daonao eine lekkere hieëring in Ós Dprpshoeës.
Gae zeetj weer allemaol welkom!
 Spek
mit Eier en Vastelaoveskiene, maondjig 20 fibrewari 2023
Ut waas
gezellig druk bie oze Spek mit Eier in combinasie mit
Vastelaoveskiene aovendj. Mit dank aan sjefkoks Peter en Jac waerdje
dur meinig eike mit spek in de pan gehaktj. Ut smaakdje idderein
good! Nao dit euverheerlijke gerecht waas ut tieëd óm te gaon kiene,
mit auch dit jaor weer hieël väöl prieëze van hooëg gehaltje. Ut
woore zoeaväöl prieëze det wae oeteindelijk zelfs veur idder rieëke
zeen gaon kiene óm de prieëze dur oet te krieëge! De prins en
prinses en sommige leeje van de jeugdraod sleipdje de meiste prieëze
in de wacht. Wae haaje zelfs ein prinse en prinsessepekske bie de
prieëze; ut noewe prinsepaar veur ut volgendje jaor is daomit sinds
gisteraovendj al gein verrassing mieër. Mer det verklappe wae neet
veur al die minse die dur neet bie woore gisteraovendj, dus nog
efkes negelbieëte tot volgendj jaor :-)
 Prinsewaage
klaormaake, maondjig 20 fibrewari 2023
Vandaag is de prinsewaage klaor gemaaktj veur de optocht van mörrege.
Prins Luc II kroop in ut "vooronder" en kwoom dao nog eine ummer
snoep oet vervlooge tieëde tege (dink van de létste 15 jaor of zoea).
Mörge waerdj de ieërste optocht mit eine angere tractor(riejer)
sinds ut begin van de optochte in Haler; mit ut euverlieje van Lei
Salemans is ein icoon oet de Halerse vastelaovendj weggevalle, de
létste kieër det de optocht in 2020 gelaupe waerdje zoot Lei nog op
de tractor achter ut steur. Mit ós gedachte bie Lei en al die kieëre
det hae de Jeugdraod door de straote van Haler trok en al die kieëre
det hae de ruumdje sting werm te stooke es wae de waage kwome
opboewe. Eine dikke merci!
Mer ieërst is dur desenaovendj spek mit eier en Vasteloaves Kiene.
Vanaaf 18.30 oor zeetj gae allemaol welkom! Kómtj ein eike mit spek
aete en preuf uch gelök mit oze geweldjige Vastelaoves Kien aovendj.
Tot strakkes!
Sleuteleuverdracht op vriedig 17 fibrewari 2023
Gistere woore wae natuurlijk bie de
Sleuteleuverdracht van de gemeindje Leudal aanwezig. Saame mit de
Walvaegers en de Puinesjödders in eine joekel van eine dubbeldekker
op weeg nao Heur. Ut waas gezellig druk, de sfeer zoot dur prima in,
de verwerming sting te blöke (ut waas dur vreiselijk werm), drank en
aete waas dur genóg. Tot vrieët laat waerdje dur gefieësj en
getampieësj. Wie laat wae truk woore? Gein idee, mer laat (of vreug,
net wieste ut bekiekst).
 Jeugdsleuteleuverdracht
op donderdig 16 fibrewari 2023
Eindelijk
waas ut zoeawieëd, de Leudalse Sleuteleuverdracht veur de Jeugd. Ut
waas vreug, ut waas laat, ut waas sjiek.
 Prinserecepsie
in Haler op zönjig 29 jannewari 2023
Wae kieëke weer teruk op eine geweldjige Bóntje Aovendj. Artieste
haaje weer koste noch meute gespaardj en ging dur vol veur. Mit mer
leefst 11 stukskes waas ut weer ein sjoeën aovendjvullendj programma
van begin tot indj. Mit dank aan alle artieste, de organisasie,
Zij-Actief veur de verzörging van de inwendjige mins, de
vriewilligers van Ós Dörpshoeës die veur ut natje zörgdje en eine
dikke merci aan alle anger minse die ich hie neet genömdj höb.
 Prinserecepsie
in Haler op zönjig 29 jannewari 2023
Ut waas
keisjiek en gezellig druk in Ós Dörpshoeës! Ós zustervereinginge oet
Hunsel, Ittervoort en Ell goove acte de presence en EllTuRo bracht
ein sjoeën serenaad aan ós prinsepaar.
 Prinserecepsie
de Zaotmaale in Rooj op zönjig 22 jannewari 2023
Ut waas weer
eine gezellige boel in de gemeinsjapszaal in Rooj. Wae brachte
neteurlijk ein bezeukske aan de prinselijke hoogheden.
 Prinserecepsie
de SerdelHunj in Hunsel op zönjig 15 jannewari 2023
Ut waas weer
eine gezellige boel in de Fanfarezaal in Hunsel. Wae brachte
neteurlijk ein bezeukske aan de prinselijke hoogheden.
 Verkaupacsie
en Prins oetroope op zaoterdig 10 december 2022
Op zaoterdig
10 december trókke wae weer naeve de deure óm lekkere kerboet, eige
gebrouwe Vleegelkesbeer, huidvleis, hamburgers, worstebreuedjes en
knapkeuk te verkaupe. Nao de verkaupacsie waerdje de prins, prinses
en adjudant oetgeroope op ut terras van ós vereinigingslokaal Ós
Dörpshoeës. Mit de vers gekooze prins, prinses en adjudant en heur
gevolg tooge wae doanoa mit de hoeëfker door ut dörp. Op zönjig 29
jannewarie kintj gae de prins, prinses en adjudant kome felicitere,
den haoje zie recepsie.
 Buutte
aovendj op zaoterdig 5 november 2022
Op zaoterdig
5 november kintj gae gaon geneete van eine geweldjige buutte-aovendj.
Deze waerdj georganiseerdj in de Uffelse Meule. Van te veure
aanmelje is verplichtj (klik oppe poster veur mieer info) via
uffelsemolen@johnklerkx.nl
|
